Cais am gymorth

Bydd eich taith gymorth yn dechrau gydag atgyfeiriad. Mae nifer o ffyrdd y gallwch gael eich atgyfeirio i Connect Gwent, gan gynnwys:

Hunanatgyfeiriad

Mae modd gwneud hyn ar-lein drwy wefan Connect Gwent, neu’n uniongyrchol drwy wefan un o’r asiantaethau yn Connect Gwent sy’n cynnig hyn (Cymorth i Ddioddefwyr ac Umbrella Cymru). Gallech hunanatgyfeirio dros y ffôn neu drwy e-bost hefyd.

Atgyfeiriad teuluol

Mae hyn os ydych chi’n atgyfeirio rhywun yn eich teulu, er enghraifft person ifanc neu oedolyn sy’n agored i niwed.

Atgyfeiriad Awtomatig gan yr Heddlu

Os ydych chi wedi riportio digwyddiad i Heddlu Gwent, bydd Swyddog Gofal Dioddefwyr yn cysylltu â chi i drafod yr opsiynau i gael cymorth sydd ar gael i chi.

Atgyfeiriad gan asiantaeth arall

Os ydych chi wedi cael cymorth gan rywun arall, a’u bod nhw’n meddwl y byddai’n fuddiol i ni roi cymorth i chi hefyd, gall asiantaethau eraill eich atgyfeirio i ni (gyda’ch caniatâd chi). Byddwn ni’n cysylltu â chi i drafod y cymorth ac egluro beth allem ni ei gynnig.

Byddwn ni’n cysylltu â chi...

Pan fyddwn ni’n cael atgyfeiriad, byddwn ni’n ceisio cysylltu â chi cyn gynted â phosib. Bydd pa unigolyn neu asiantaeth sy’n cysylltu â chi yn dibynnu ar y ffordd daeth eich atgyfeiriad aton ni. Dyma rywfaint o wybodaeth am bwy allai eich ffonio chi.

Heddlu Gwent

Staff Heddlu Gwent, sef Swyddogion Gofal Dioddefwyr, fydd yn cysylltu â’r rhan fwyaf o bobl. Os gwnaethoch chi hunanatgyfeiriad i Connect Gwent (yn hytrach nag yn uniongyrchol i un o’r asiantaethau sy’n rhan ohono), bydd Swyddog Gofal Dioddefwyr yn pennu pa asiantaeth fyddai fwyaf addas i chi.

Un o’r asiantaethau eraill

Os ydych chi (neu’r unigolyn a wnaeth yr atgyfeiriad ar eich rhan) wedi gofyn i asiantaeth benodol sy’n rhan o Connect Gwent gysylltu’n uniongyrchol â chi, dyna pwy fydd yn cysylltu â chi.

Mae siarad yn beth da...

Pan fydd aelod o’r tîm yn cysylltu â chi, byddwn ni’n gwirio yn gyntaf ei bod hi’n amser cyfleus (a diogel) i siarad. Byddwn ni hefyd yn gwirio pethau fel eich manylion cyswllt er mwyn gwneud yn siŵr mai gyda chi rydyn ni’n siarad, ac yna byddwn ni’n gofyn rhai cwestiynau er mwyn ein helpu i bennu beth allwn ni ei gynnig a sut i’ch cefnogi.

Gallwn ni helpu gyda llawer o wahanol bethau, felly does dim rhaid iddo fod am effaith uniongyrchol y digwyddiad bob tro. Os na allwn ni helpu gyda rhywbeth penodol, mae’n bosib y byddwn ni’n gwybod am rywun sy’n gallu... mae bob amser yn werth gofyn i ni.

Byddwn ni’n siarad gyda ni’n hunain...

Dyma’r fantais fawr o fod yn wasanaeth amlasiantaeth. Mae’n golygu bod modd i ni rannu profiadau’r holl arbenigwyr sy’n gweithio yma.

Er mwyn gwneud yn siŵr bod y person cywir a gorau yn eich cefnogi, mae’n bosib y byddwn ni’n trafod y wybodaeth a ddarparwyd gennych chi. Fyddwn ni ddim yn defnyddio enwau ar y pwynt yma, oni bai eich bod chi wedi rhoi caniatâd i ni wneud hynny. Dim ond er mwyn deall natur y cymorth rydych chi’n chwilio amdano byddwn ni’n gwneud hyn, ac i ddefnyddio sgiliau’r tîm cyfan i wneud eich taith mor gyfforddus â phosib.

Pan fyddwn ni wedi gwneud hyn, byddwn ni’n gwybod pwy ddylai gysylltu â chi. Os ydych chi eisoes wedi rhoi caniatâd i’ch gwybodaeth gael ei rhannu gyda’r unigolyn cywir, byddan nhw’n eich ffonio chi’n uniongyrchol. Os nad ydych chi wedi gwneud hynny, bydd yr unigolyn cyntaf siaradoch chi â nhw yn cysylltu gyda chi i drafod hyn gyda chi ac i ofyn am eich caniatâd. Gallwch wrthod rhoi caniatâd neu ei dynnu’n ôl ar unrhyw adeg.

Mae cymorth wrth law...

Pan fydd eich gwybodaeth gan yr unigolyn cywir, byddan nhw’n cysylltu â chi i drafod cymorth. Gallai’r cymorth y byddan nhw’n ei ddarparu fod dros y ffôn, drwy neges destun neu e-bost, neu wyneb yn wyneb. Bydd hyn yn dibynnu ar y cymorth rydych chi’n ei gael, a sut maen nhw’n meddwl byddai hyn yn gweithio orau.

Gallai’r cymorth fod yn fyr (er enghraifft galwad ffôn neu e-bost yn cynnwys gwybodaeth), neu gallai fod ychydig yn hirach er mwyn gwneud yn siŵr eich bod chi’n cael popeth gallwn ni ei ddarparu. Y naill ffordd neu'r llall, bydd eich Gweithiwr Achos yn trafod hyn gyda chi ac yn datblygu cynllun gyda chi.

Mae’n bryd dweud ffarwél...

Ar ôl i chi wneud popeth roeddech chi’n bwriadu ei wneud gyda’ch Gweithiwr Achos, byddan nhw’n gofyn rhai cwestiynau i chi er mwyn gweld sut mae pethau wedi mynd ers y dechrau. Mae’n bosib y byddan nhw’n gofyn rhai cwestiynau ynghylch sut rydych chi’n teimlo mae’r cymorth wedi effeithio ar wahanol bethau (er enghraifft ydych chi’n teimlo’n fwy diogel, neu’n fwy gwybodus). Mae hyn yn ein helpu ni i adolygu ein cymorth a datblygu mewn meysydd os oes angen. Byddwch yn onest, rydyn ni wir yn gwerthfawrogi adborth.

Sut gwnaethon ni?

Os ydych chi wedi rhoi caniatâd i’r tîm arolwg o Heddlu Gwent gysylltu â chi, byddan nhw’n cysylltu i ofyn rhagor o gwestiynau am y gwasanaeth gawsoch chi gan Connect Gwent yn gyffredinol, ynghyd â chwestiynau am eich Gweithiwr Achos yn benodol. Unwaith eto, byddwch yn onest, mae hyn yn ein helpu ni i wella, ac rydyn ni wir yn gwerthfawrogi pob adborth.

Siaradwch gyda ni

Os hoffech chi siarad gydag un o’r Swyddogion Gofal Dioddefwyr (Heddlu Gwent) a all helpu i gyfeirio eich galwad at y tîm cywir, ffoniwch

0300 123 2133.
Mae’r llinellau ar agor:
Llun-Gwe - 8am - 6pm
Penwythnos - AR GAU

Gallwch adael neges ar y peiriant ateb y tu allan i’r oriau hyn, a bydd rhywun yn eich ffonio’n ôl. Cofiwch rannu’ch enw a’r rhif gorau i ni ffonio’n ôl.

Rydyn ni’n hoff iawn o negeseuon e-bost

Gallwch anfon e-bost aton ni 24/7, yn cynnwys unrhyw beth o gais am alwad yn ôl i fanylion llawn yr hyn hoffech chi gymorth yn ei gylch. Heddlu Gwent sy’n rheoli’r mewnflwch, a byddan nhw’n cyfeirio’r ymholiad at yr aelod perthnasol o’r tîm. Mae’n bosib y byddan nhw’n dod yn ôl atoch chi i gael rhagor o wybodaeth er mwyn eich cael chi at yr unigolyn cywir. Anfonwch eich e-bost at:

[email protected]

Gallwn ni helpu!

Gall unrhyw asiantaeth wneud atgyfeiriad drwy glicio ar y botwm isod i lawrlwytho ein ffurflen atgyfeirio. Llenwch y ffurflen a’i hanfon aton ni drwy e-bost:

[email protected]

Cymraeg English